បទសម្ភាសន៍: Snapyshop ទីផ្សារនៅលើបណ្តាញអ៊ីនធើណេត

ប្រសិន​បើ​អ្នក​មាន​ស​ម្លៀ​ក​បំពាក់​ឬ​វត្ថុណា​មួយ​ដែល​អ្នក​ចង់​លក់​ឬ​ក៏អ្នក​គឺ​ជា​អ្នក​ជំនួញ​ម្នាក់ដែល​ចង់​ពង្រីក​ប​ណ្តា​ញ​នោះ ​អ្នក​ប្រហែល​ជា​ចង់​អាន​នៅ​លើអត្ថបទនេះ​ហើយ។ Geeks នៅ​ក្នុង​ប្រទេស​កម្ពុជា​បាន​សំភាសន៍ជាមួយ​នឹង​ក្រុម​ដែល​នៅ​ពី​ក្រោយ SnapyShop នេះ​ដែលជា​គម្រោង​មួយនៅក្នុងព្រឹត្តិការណ៍ Startup Weekend ដែលអាចប្រែ​ក្លាយទៅ​ជាអាជីវកម្មមួយ​ដ៏​មាន​តម្លៃ​។ សូមស្វែង​យល់​អំពី​របៀប​ដែលអាជីវកម្មរបស់​ពួកគេ​ដំណើរការ មូលហេតុ​ដែល​ពួក​គេ​​ធ្វើ​វា និងដំបូន្មាន​មួយ​ចំនួន​នៅ​លើ​ការ​ចាប់ផ្ដើម​អាជីវកម្ម​ថ្មីនៅក្នុងអត្ថបទសំភាសន៍នេះ

//

(កិច្ចសំ​ភា​ស​ន៍​នេះ​ត្រូវ​បាន​កែសម្រួល​សម្រាប់​​​ភាព​ច្បាស់​លាស់​)

តើ​អ្នក​អាច​ណែនាំ​អំពីខ្លួន​អ្នកបានទេ?

IMG_5388

ពីឆ្វេងទៅស្តាំ: ចំណាប់ មុនី សុខឡី វលក្ខណ៍ សារ៉ាត់

ចំណាប់​: ខ្ញុំជាអ្នកជំនាញ​កម្មវិធី​។

មុនី​: ខ្ញុំជាអ្នករចនា​ ហើយ​ខ្ញុំ​ទទួល​បន្ទុកខាងផ្នែក UX/UI។ ខ្ញុំ​ធ្វើ​អោយប្រាកដ​ថា​អ្នក​ប្រើប្រាស់​យល់ឃើញ​ថា​វា​មាន​ភាព​ងាយ​ស្រួល​ក្នុង​ការ​ប្រើ​ប្រាស់​ផលិតផល​របស់​យើង​ ហើយ​​មើល​ទៅ​មានលក្ខណៈល្អ​។

សុខឡី​: ខ្ញុំជាអ្នកជំនួញម្នាក់​ទទួល​បន្ទុកខាង​ផ្នែក ទីផ្សារ ​ហិរញ្ញវត្ថុ​ ការ​លក់ ​និង​ ប្រតិ​ប​ត្ដិ​ការ​ធនធាន​មនុស្ស​។

វលក្ខណ៍​: ខ្ញុំជាអ្នកអភិវឌ្ឍន៍កម្មវិធី​​។

សា​រ៉ា​ត់: ខ្ញុំជាអ្នកទទួល​បន្ទុកខាង​ការ​អភិវឌ្ឍន៍​ផ្នែក​ខាង​មុខ​ហើយ​ខ្ញុំ​បាន​ធ្វើ​ការ​ជាមួយ​នឹង​ទីផ្សារ​។

តើ SnapyShop គឺ​ជា​អ្វី​?

វលក្ខណ៍​: SnapyShop គឺជា​ទីផ្សារ​នៅលើប​ណ្តា​ញអ៊ីនធើណេតមួយ​ ដែល​ជា​កន្លែង​ដែល​អ្នក​ប្រើ​ប្រាស់​អាច​ស្វែង​រក​ផលិត​ផល​ជា​ច្រើន​មក​ពី​បុគ្គល​ផ្សេងៗ​គ្នា​និង​ឈ្មួញ​នានា។ វា​អនុញ្ញាតអោយអ្នក​ទិញ​និង​អ្នក​លក់​មានទំនាក់ទំនងគ្នា​។

សុខឡី: អ្នក​លក់​អាច​ចុះ​ឈ្មោះ​និង​បង្កើត​ហាង​ផ្ទាល់​ខ្លួនរបស់​ពួក​គេ​លើ​ប​ណ្តា​ញ ​​អាប់ឡូតរូបភាព​តាម​រយៈ​កម្មវិធី​ទូរស័ព្ទ​ដៃ​របស់​យើង​ហើយ​បន្ទាប់​មក​រាយ​នាមផលិតផល​របស់​ពួកគេ​នៅ​លើ SnapyShop ។ មកដល់ពេលឥឡូវនេះ​យើង​មានអ្នកប្រើប្រាស់​ប្រហែល 400 នាក់​។

Collage

ហេតុ​អ្វី​បាន​ជា​អ្នក​សម្រេច​ចិត្ត​ថា​នឹង​ចាប់​ផ្តើ​ម Snapyshop​ នេះ ?  តើវា​ត្រូវ​បាន​បង្កើត​ឡើង​នៅ​ពេលណា ​?

សុខឡី​: SnapyShop ត្រូវ​បាន​បង្កើត​ឡើង​កាល​ពី​ខែ​វិច្ឆិកា​ឆ្នាំ​មុន​។ យើង​បាន​រក​ឃើញ​ថា​ពុំ​ទាន់មាន e​-commerce ឬ​ផ្សារ​ទំនើប​ណាមួយ​បាន​បំពេញទៅ​តាមតម្រូវការ​របស់ប្រជាជននោះឡើយ។ មាន​មនុស្ស​ជា​ច្រើន​បាន​ត្អូញ​ត្អែ​រ​ថា​ទីផ្សារ​អន​ឡា​ញ​ដែល​មាន​ស្រាប់​គឺ​មិន​ងាយ​ស្រួល​ប្រើ​ឡើយ។ ជា​មួយ​នឹង សហគ្រាសខ្នាតតូចនិងមធ្យមចំនួន 500.000 នៅ​ក្នុង​ប្រទេស​កម្ពុជា​ មាន​តែ 34​% តែប៉ុននោះត្រូវ​បាន​ចុះ​បញ្ជី​នៅ​ក្នុងក្រសួង​ពាណិជ្ជកម្ម​។ បើតាម​ការ​ស្រាវជ្រាវ​របស់​យើង ​យើង​បាន​រក​ឃើញថា ​ ​ពួក​គេភាគ​ច្រើនមិនមាន​គំនិតអ្វី​អំពីរបៀប​ធ្វើ​ការនៅលើ​ទីផ្សារ​ឌីជីថល​និង​ដើម្បី​បង្កើនការយល់ដឹងផលិត​ផល​របស់​ពួក​គេ​នៅលើបណ្តាញឡើយ​។ មានមនុស្ស​ជា​ច្រើន​ចង់​រក​វេទិកា​ដ៏​សាមញ្ញ​មួយ​ដើម្បី​រាយនាម​ផលិត​ផល​របស់​ពួក​គេ​ ប៉ុន្តែ​ពួក​គេ​មិនមាន​ចំណេះ​ដឹងអំ​ពី​របៀប​ដើម្បី​ធ្វើ​វា​នោះ​ទេ​។ យើង​ចង់​ជួយសហគ្រាសខ្នាតតូចនិងមធ្យមទាំង​នោះអោយរីកចំរើននិង​ក៏​ដូចជាបំពេញ​ចន្លោះ​នៅ​ក្នុង​ទីផ្សារ​ផងដែរ​។

តើអ្នក​ប្រើប្រាស់​អាច​បង់​ប្រាក់​សំរាប់មុខទំនិញនោះដោយរបៀប​ណា​?

វលក្ខណ៍​: នៅ​ក្នុង​ពេល​អនាគត​យើង​ចង់​រួម​បញ្ចូល​វិធី​សា​ស្រ្ត​ការ​ទូទាត់​ដូចជា PayPal និង​ វី​ង​។ ប៉ុន្តែ​ឥឡូវ​នេះ​យើង​ចង់​ធ្វើ​អោយមានភាព​ប្រសើរ​ឡើង​ជាមុនសិន​។ ពួក​គេ​អាច​បង់​ជា​សាច់​ប្រាក់​តាម​រយៈ​ការ​​ចែក​ចាយ​មកដល់ទីកន្លែង។

ចំណាប់​: ប្រសិន​បើ​អ្នក​ទិញ​បាន​បង្ហាញ​ពីការ​ចាប់​អារម្មណ៍​ចំពោះទំនិញនោះ ពួក​គេ​អាច​ជជែក​ជាមួយ​អ្នក​លក់​ដើម្បី​ចរចា​តំលៃ។

វលក្ខណ៍​: លក្ខណៈ​ពិសេស​នេះ​គឺ​មាន​សារៈ​សំខាន់ណាស់​ខណៈ​ដែល​ហាង​លក់ទំនិញ​នៅលើ​ប​ណ្តា​ញ​ជា​ច្រើន​គ្រាន់​តែ​ប្រកាស​ពី​គោល​បំណង​របស់​ខ្លួន​ក្នុង​ការ​លក់​នៅ​លើ Instagram ឬ Facebook ។ បន្ទាប់​ពី​នោះមកពួក​គេ​ត្រូវ​បាន​ចូល​ទៅ​កាន់​វេទិកា​មួយ​ផ្សេង​ទៀត​ដើម្បី​ដោះស្រាយ​លើការ​បង់​ប្រាក់​ដែល​​ប​ណ្តា​ល​អោយអ្នក​ទិញ​​មាន​អារម្មណ៍​ថាដាច់ឆ្ងាយ​យ៉ាងខ្លាំង​ពី​អ្នក​លក់​​។

ជា​មួយ​នឹង​ប្រព័ន្ធ e​-commerce កាន់​តែ​ច្រើន​ដែលនឹងចូល​មកដល់ ​តើ​អ្នក​នៅតែស្ថិតក្នុង​ការ​ប្រកួត​ប្រជែង​នៅ​ក្នុង​ទីផ្សារ​នេះ​ដោយ​របៀប​ណា​?

សុខឡី: យើង​តែងតែព្យាយាម​ជានិច្ច​ដើម្បីធ្វើអោយប្រព័ន្ធ​របស់យើងមានភាពប្រសើរ​ឡើង​​ ហើយ​យើង​មានចំនុចផ្ទាល់​ខ្លួន​របស់​យើងតែ​មួយ​គត់​ ​។

ចំណាប់​: យើង​មាន​លក្ខណៈ​ពិសេស​តែ​មួយ​គត់​សម្រាប់​ម្ចាស់​ហាង​អេឡិចត្រូនិក​ដែល​អនុញ្ញាត​អោយ​ពួក​គេ​ដើម្បី​បើក​ដំណើរ​ការ​គេហទំព័រ​ផ្ទាល់​របស់​ខ្លួន​និង​ប្រើ​ប្រាស់វេទិកា SnapyShop ក្នុង​ការ​លក់​ផលិតផល​របស់​ខ្លួន​។

តើ​អ្វីជាឧបសគ្គ​ដែល​អ្នក​បាន​ជួប​ប្រទះ​នៅ​ពេល​ដែល​អភិវឌ្ឍន៍ Snapyshop នេះ ​?

ចំណាប់​: យើង​បាន​ចាប់​ផ្តើ​ម SnapyShop នេះ​ជាមួយនិងភាសា​អង់គ្លេស​ ​ហើយ​ពួក​គេ​មិន​បាន​ដឹង​ថា​យើង​ជា​អាជីវកម្ម​ក្នុង​ស្រុកឡើយ​។ ពួក​គេ​បាន​គិត​ថា​យើង​មក​ពី​បរទេស​។ ចំពោះពួកគេ​ ​វា​ជា​ការ​លំបាក​ណាស់ក្នុង​ការ​យល់​ពី​អ្វី​ដែល SnapyShop នេះចង់​មាន​ន័យយ៉ាងណា​។ ឥឡូវ​នេះ​យើង​កំពុង​ដោះស្រាយ​បញ្ហា​នេះ​ដោយ​​បកប្រែ​អ្វី​ៗគ្រប់​យ៉ាង​ទៅ​ជា​ភាសា​ខ្មែរ​ដែល​ធ្វើអោយវា​មាន​ភាព​ងាយ​ស្រួល​សម្រាប់​ប្រជាជន​អោយយល់​។

សុខឡី: រហូត​មក​ដល់​ពេល​នេះ​ យើង​បាន​ទទួល​យោបល់​ត្រឡប់​ពី​អ្នកប្រើប្រាស់​ ដូច្នេះ​យើង​ព្យាយាម​​ជួសជុលវា​និង​កែលម្អ SnapyShop ដើម្បី​ធ្វើអោយពួក​គេ​ស៊ាំ​ជាមួយនិង​ប្រព័ន្ធនេះ​។

តើ​អ្នក​គិតថា Snapyshop នឹងធ្វើអោយមានការ​ផ្លាស់​ប្តូ​រ​ពាណិជ្ជកម្ម​អេឡិចត្រូនិក​នៅ​ក្នុង​ប្រទេស​កម្ពុជា​បានដោយរបៀបណាដែរ?

សុខឡី: ជា​ធម្មតា​ប្រព័ន្ធ e​-commerce មាន​ផល​ប្រយោជន៍​ជាច្រើន​។ អ្នក​អាច​សន្សំសំចៃ​ពេល​វេលា​ ប្រាក់​កាស បង្កើន​ភាព​ងាយ​ស្រួល​។ អ្នក​អាច​ស្វែងរក​អ្វី​បាន​កាន់​តែ​ច្រើនបាន​យ៉ាង​ងាយ​ស្រួល​និង​កាន់តែមាន​ផលិតភាព​​។ វា​ជួយ​អោយ​អាជីវកម្ម​របស់អ្នកជំនួញបានទទួលជោគជ័យ​ផង​ដែរ​។ យើង​មាន​គម្រោង​ដើម្បី​ភ្ជាប់​ផលិតកម្ម​ក្នុងស្រុកទៅកាន់​ទីផ្សារ​ក្រៅ​ប្រទេស​ដែល​នឹង​បើក​ច្រក​បន្ថែម​ទៀត​សម្រាប់​ឈ្មួញ​នៅ​ទីនេះ​។

ចំណាប់​: SnapyShop ក៏​អនុញ្ញាត​អោយ​បុគ្គលម្នាក់​ៗដើម្បីលក់ទំនិញដែលពួកគេមិនចង់បាន​ទៅ​កាន់គ្នា​ទៅវិញទៅមកផងដែរ​។ វា​មានលក្ខណៈ​លឿន​​និង​សាមញ្ញ​។

តើ​អ្វីជា​ផែន​ការ​នា​ពេល​អនាគត​របស់​អ្នក​សម្រាប់ Snapyshop ​?

សុខឡី​: ចក្ខុវិស័យ​របស់​យើង​គឺ​ដើម្បី​ផ្តល់​ជូន​នូវ​សេវាកម្ម​ដ៏​ល្អ​បំផុត​សម្រាប់​ហាងលក់​និង​អ្នក​ទិញ​។ យើង​មាន​អារម្មណ៍​ថា​មាន​ទំនុក​ចិត្ត​ដូច​ដែល​យើង​មាន​ក្រុម​ដ៏​ខ្លាំង​ហើយ​យើង​កំពុង​ធ្វើ​ការ​ស្រាវ​ជ្រាវ​ទី​ផ្សារ​ជា​ច្រើន​នៅ​លើ​លក្ខណៈ​ពិសេស​ថ្មី​ៗក៏​ដូច​ជា​ដៃ​គូ​ប្រកួត​ប្រជែង​របស់​យើងផងដែរ​។ នៅ​ក្នុងវិស័យ e​-commerce​ វា​ត្រូវ​ការចំណាយ​ប្រតិ​ប​ត្ដិ​ការ​ជា​ច្រើន​ដើម្បី​អប់រំ​ប្រជាជន​ដើម្បីអោយ​ពួក​គេ​ស៊ាំ​ជាមួយ​ប្រព័ន្ធនេះ​។ យើង​មាន​បំណង​ដើម្បី​រៀន​ពី​អ្នកប្រឡូកដ៏ធំ​មួយដែល​បាន​ចូល​ទៅ​ក្នុង​ទីផ្សារ​។

តើអ្នកមានដំបូន្មាន​អ្វីខ្លះ​សំរាប់​ស្ថាបនិក​ដែលមានបំណងចង់ចាប់ផ្ដើម​អាជីវកម្ម​ ?

វលក្ខណ៍​: ប្រសិន​បើ​ពួក​គេ​ពិត​ជា​ចង់​ចាប់​ផ្ដើម​អាជីវកម្មរបស់​ខ្លួន​ ពួក​គេ​ត្រូវ​តែគិតទៅដល់​អ្វី​ដែល​ជាជំនាញ​ដ៏​ល្អ​បំផុត​របស់​ខ្លួន​។

មុនី ​: នៅពេល​ដែល​អ្នក​ចង់​ចាប់ផ្ដើម​អាជីវកម្មមួយ​ ​អ្នក​ត្រូវ​តែ​យល់​យ៉ាង​ច្បាស់​នូវ​អ្វី​ដែល​ជា​គោល​បំណង​របស់​អ្នក​​។ យល់​ពី​ទី​ផ្សារ​ក្នុង​ស្រុក​និង​ស្វែង​រក​អ្វី​ដែល​ពួក​គេ​ត្រូវ​ការ​។ ចំពោះ​យើង​ យើង​បាន​រក​ឃើញ​ថា​មនុស្ស​ចង់​ប្រើ​ប្រាស់ទូរស័ព្ទដៃ​របស់​ពួក​គេ​ដើម្បី​រក​មើល​នៅ​លើ​កម្មវិធី​។ យើង​បាន​យល់​ពី​តម្រូវ​ការ​ទី​ផ្សារ​នេះ​ ហើយ​យើងបាន​បំពេញ​គម្លាត​នេះ​។

សុខឡី​: ចាប់ពី​ទស្សនៈ​អាជីវកម្ម​នេះ​ អ្នក​គួរ​តែ​ព្យាយាម​ដើម្បី​ដោះស្រាយ​បញ្ហា​ដែល​មាន​ស្រាប់​នៅ​ក្នុង​សង្គម​ដើម្បី​ស្វែង​រក​ដំណោះ​ស្រាយ​ដ៏​ល្អ​។ អ្នក​ត្រូវ​តែ​ធ្វើ​ការ​ស្រាវ​ជ្រាវ​ទី​ផ្សារ​​ដើម្បី​យល់​ថា​តើ​នេះ​គឺ​ជាវិស័យ​ដ៏​ល្អ​ដើម្បី​ធ្វើ​ការ​ចាប់​ផ្ដើមអាជីវកម្ម​មួយនេះដែរឬទេ​។ ប្រសិន​បើ​អ្នក​ជ្រើសរើស​វិស័យ​ខុស​នោះ​វា​អាច​ចំណាយ​ពេល​វេលា​យ៉ាងច្រើន​ដោយ​សារ​តែ​កង្វះ​ខាត​តម្រូវ​ការ​បែប​នេះ​។

បន្ទាប់មកអ្នកត្រូវស្វែងរក​ក្រុម​ដែល​មាន​សមត្ថភាព​ខ្លាំង​។ ខ្លួន​អ្នកផ្ទាល់​ត្រូវតែកាន់ការគ្រប់គ្រង​ ភាព​ជា​អ្នកដឹកនាំ​និង​ជំនាញ​រវាង​បុគ្គល​​។ សូម​ចងចាំ​ថា​ ក្រុម​របស់​អ្នក​គឺ​ជា​ទ្រព្យ​ដ៏​សំខាន់​បំផុត ​ជា​ពិសេស​នៅក្នុង​វិស័យ​បច្ចេកវិទ្យា​នេះ​។

នៅ​ក្នុងអាជីវកម្មមួយ​ ​អ្នក​ត្រូវ​តែ​ប្តេ​ជ្ញា​ចិត្តយ៉ាង​ខ្លាំង​​ហើយ​អ្នក​ត្រូវ​តែ​លះបង់​ពេល​វេលា​ជា​ច្រើន​ក្នុង​គោល​បំណង​ដើម្បី​ផ្តោ​ត​ទៅ​លើវា។

ចំណាប់​: អ្នក​ត្រូវ​តែធានា​​ថា​ក្រុម​នេះ​​ធ្វើ​ការបាន​យ៉ាង​ល្អ​ជាមួយនិងគំនិត​នីមួយៗ​។ ដាក់​ការ​ស្រាវ​ជ្រាវជាច្រើន​​​ចូល​ទៅ​ក្នុង​គំនិត​របស់​អ្នក​និង​ធ្វើអោយ​ប្រាកដ​ថា​វា​មាន​លទ្ធភាព​ដែលនិង​អាចធ្វើការបាន​។

សា​រ៉ា​ត់​: អ្នក​គួរ​តែបង្កើត​អ្វី​ដែល​ប្រជាជន​ចង់​បាន​។ ចំនាយពេល​វេលា​និងកិច្ចខិត​ខំ​ប្រឹងប្រែង​ដើម្បី​ស្វែងយល់នូវអ្វី​ដែល​មនុស្ស​ត្រូវ​ការ​ ស្វែងរក​ក្រុមណា​ដែល​មាន​ចំណង់​ចំណូល​ចិត្ត​ដូច​គ្នា​និងមាន​ទិសដៅ​ដូច​​អ្នក​។

តើ​អ្នក​មាន​ពាក្យអ្វី​ចុង​ក្រោយ​ទេ​?

សុខឡី: យើង​ចង់​ឱ្យ​អ្នក​រាល់​គ្នា​ដឹង​ថា​ យើង​នឹង​ព្យាយាម​អោយបានល្អ​បំផុត​​ដើម្បី​បម្រើ​អតិថិជន​របស់​យើងអោយបានល្អ​​។ យើង​ចង់អោយ​មានភាពទំនើប​មួយ និង​​ជួយ​ប្រជាជនដើម្បីធ្វើ​អាជីវកម្ម​របស់​ពួក​គេ​អោយកាន់​តែ​ងាយ​ស្រួល​និងមានជីវិត​រស់នៅ​អោយកាន់តែល្អប្រសើរ​ជាង​មុន​​។

សូម​អរគុណ​!

ចង់សាកល្បង SnapyShop ដែរឬទេ? លោកអ្នកគ្រាន់តែចូលទៅកាន់គេហៈទំព័រ SnapyShop.com ឥឡូវនេះ !